ભાજપ તો હવે અમેરિકા અને રશિયા સાથે દેશમાં ચૂંટણી કરાવવાનું પણ કહી શકે : શિવસેના


મુંબઈ, તા.14 (પીટીઆઇ) : ભાજપ તો અમેરિકા અને રશિયા સાથે જ દેશમાં ચૂંટણી કરવાનું કહી શકે છે, એવું જણાવી શિવસેનાએ આજે ભાજપના `એક દેશ, એક ચૂંટણી' સંબંધી પ્રસ્તાવની ઠેકડી ઉડાવી હતી. શિવસેનાના નેતા અને રાજ્યસભાના સભ્ય સંજય રાઉતે કહ્યું હતું કે લોકસભા અને તમામ રાજ્યોની વિધાનસભાની ચૂંટણીઓ એકસાથે કરાવવાથી દેશને શું લાભ થશે, એ મને નથી સમજાતું. 
આ સંબંધે ભાજપની  ઠેકડી ઉડાવતા રાઉતે કહ્યું હતું કે ભાજપ લોકસભા અને વિધાનસભાઓની ચૂંટણીઓ એકસાથે કરાવી શકે છે. ભાજપના ટોચના નેતાઓના દિમાગમાં હવે એવા આઇડિયા આવે કે અમેરિકા અને રશિયા સાથે જ ભારતમાં ચૂંટણી થવી જોઇએ, તો પણ નવાઇ પામવા જેવું નથી. પરંતુ આમાં દેશને શું ફાયદો થશે, એ ભાજપે સમજાવવું જોઇએ.

© 2018 Saurashtra Trust

Developed & Maintain by Webpioneer