પ.બંગાળની હિંસાએ લીધો રાજકીય રંગ

પ.બંગાળની હિંસાએ લીધો રાજકીય રંગ
પીએમ મોદીએ રાજ્યપાલ સાથે ફોન પર વાત કરી : નડ્ડા પહોંચ્યા કોલકાતા, ભાજપ આજે કરશે દેશવ્યાપી ધરણા
નવી દિલ્હી, તા. 4 : પશ્ચિમ બંગાળમાં વિધાનસભા ચૂંટણીના પરિણામો બાદથી જારી હિંસાએ રાજકીય રંગ લીધો છે. એક તરફ ભાજપે હિંસાના વિરોધમાં કોરોનાના કેર વચ્ચે આવતીકાલે દેશભરમાં ધરણાનું એલાન કર્યું છે, બીજીતરફ વડાપ્રધાન નરેન્દ્ર મોદીએ રાજ્યપાલ જગદીપ ધનખડને ફોન કરીને કાયદો અને વ્યવસ્થાની સ્થિતિ પર ચિંતા અને દુ:ખ વ્યક્ત કર્યું હતું. બીજીતરફ ભાજપના રાષ્ટ્રીય પ્રમુખ જે.પી. નડ્ડા કોલકાતા પહોંચ્યા હતા જ્યાં તેમણે હિંસાની નિંદા કરી હતી.  બીજીતરફ બંગાળમાં હિંસાનો મામલો હવે સુપ્રીમ કોર્ટ પહોંચ્યો છે. ભાજપના નેતા અને વરિષ્ઠ વકીલ ગૌરવ ભાટિયાએ કોર્ટમાં અરજી કરી હતી. સીબીઆઇ તપાસની માંગ કરી કેન્દ્રીય ગૃહ મંત્રાલયે પણ રાજ્ય સરકાર પાસેથી વિપક્ષી કાર્યકરો પર હુમલા અંગે તથ્યાત્મક અહેવાલ માગ્યો છે.
ઉલ્લેખનીય છે કે, પશ્ચિમ બંગાળમાં ચૂંટણીના પરિણામો બાદ રાજકીય હિંસાનો દોર જારી છે. પરિણામોની જાહેરાત બાદથી બંગાળ સળગી રહ્યું છે. કથિત રીતે દુકાનો લૂંટવા, આગજનીની ઘટનાઓ વચ્ચે અનેક ભાજપ કાર્યકરોનાં મૃત્યુ થયાં હતાં. આરામબાગમાં ભાજપ કાર્યાલયમાં આગ લગાડવામાં આવી હતી, તો કૂચબિહારથી પણ હિંસાના અહેવાલો હતા. ભાજપ આ હિંસા અંગે તૃણમૂલ કોંગ્રેસ પર આરોપ લગાવી રહ્યો છે.
બંગાળના રાજ્યપાલ ધનખડે બપોરે ટ્વિટ કરીને માહિતી આપી હતી કે, વડાપ્રધાન મોદીએ તેમની સાથે ફોન પર વાત કરી હતી અને હિંસા પર ચિંતા વ્યક્ત કરી હતી.
કોલકાતા પહોંચેલા ભાજપ અધ્યક્ષ નડ્ડાએ કહ્યું કે, ચૂંટણી પરિણામ બાદ જે હિંસાની ઘટનાઓ સામે આવી રહી છે તે ઝટકો આપનારી છે. સ્વતંત્ર ભારતમાં આવી અસહિષ્ણુતા આ પહેલાં કદી જોઈ નથી.
Published on: Wed, 05 May 2021

© 2021 Saurashtra Trust

Developed & Maintain by Webpioneer