આંદોલનમાં મૃત્યુ પામેલા ખેડૂતોને વળતર આપો

આંદોલનમાં મૃત્યુ પામેલા ખેડૂતોને વળતર આપો
સરકાર પાસે વિગતો ન હોય તો હું આપું : રાહુલ ગાંધી
અમારા પ્રતિનિધિ તરફથી
નવી દિલ્હી, તા. 3 : ખેડૂત આંદોલન દરમિયાન મૃત્યુ પામેલા ખેડૂતોની કોઈ વિગત નથી એવા સરકારના નિવેદન અંગે રાહુલ ગાંધીએ કેન્દ્ર સરકાર પર જોરદાર હુમલો ર્ક્યો હતો અને કહ્યું હતું કે કૉંગ્રેસ ખેડૂત આંદોલન દરમિયાન માર્યા ગયેલા ખેડૂતોની યાદી સંસદમાં રજૂ કરશે.
મૃતક ખેડૂતોના પરિવારને સરકાર વળતર ચૂકવશે કે એવો સવાલ સંસદમાં પૂછવામાં આવ્યો હતો જેના જવાબમાં કૃષિપ્રધાને જણાવ્યું હતું કે તેમની પાસે આ અંગેની કોઈ વિગત નહીં હોવાથી વળતર ચૂકવવાનો સવાલ જ ઊભો થતો નથી. રાહુલ ગાંધીએ સરકારની આ વાતને જૂઠાણું ગણાવી ખેડૂત પરિવારોને વળતર ચૂકવવાની માગણી કરી હતી.
વધુમાં તેમણે કહ્યું હતું કે, વડા પ્રધાને પોતે કહ્યું છે કે તેમણે ભૂલ કરી છે, તેમણે દેશની માફી માગી છે. એ ભૂલના પરિણામે 700 લોકોએ જીવ ગુમાવ્યો છે. હવે તમે તેમની વિગતો અંગે જૂઠું બોલો છો, એમનું વળતર ચૂકવી દેવાનું સૌજન્ય તમારામાં નથી? એવું જણાવતાં તેમણે કહ્યું હતું કે પંજાબ સરકારે આવા 403 ખેડૂત પરિવાર દીઠ પાંચ લાખ રૂપિયાનું  વળતર ચૂકવ્યું છે. ઉપરાંત 152 જણને નોકરી આપી છે. અન્ય રાજ્યના આવા 103 ખેડૂતોનાં નામની અમારી પાસે યાદી છે. ત્રીજી યાદી તો જાહેર સૂચનામાં છે જેને સરળતાથી વેરિફાય કરી શકાય એમ છે, પરંતુ સરકાર કહે છે કે આવું કોઈ લિસ્ટ છે જ નહીં.
સરકારના ઈરાદા સામે સવાલ ઉઠાવતાં રાહુલ ગાંધીએ કહ્યું હતું કે મને નથી લાગતું કે મોદી સરકાર કૃષિ કાયદા રદ કરવા સિવાયની ખેડૂતોની કોઈ માગણીનો સ્વીકાર કરે.
Published on: Sat, 04 Dec 2021

© 2022 Saurashtra Trust

Developed & Maintain by Webpioneer