સાવધાન : દેશમાં કોરોના બેકાબુ બનતો જાય છે

સાવધાન : દેશમાં કોરોના બેકાબુ બનતો જાય છે
સૌથી વધુ 2.64 લાખ  નવા સંક્રમિતો, ઍક્ટિવ કેસો વધીને 12 લાખને પાર : ઓમિક્રોનના 5753 કેસ
નવી દિલ્હી, તા. 14 (પીટીઆઈ) : ભારતમાં કોરોનાના કેસમાં છેલ્લા 24 કલાકમાં 2,64,202 નવા કેસ નોંધાયા છે, જે 239 દિવસોમાં સૌથી વધુ છે. આ નવા કેસ સાથે સંક્રમિતોની સંખ્યા વધીને 3,65,82,129 થઈ ગઈ છે. એમાં ઓમિક્રોન વેરિયન્ટના 5,753 કેસનો સમાવેશ થાય છે. કેન્દ્રના આરોગ્ય મંત્રાલયે શુક્રવારે જાહેર કરેલા આંકડા પરથી આ માહિતી મળી છે.
દેશમાં ઓમિક્રોનના કેસમાં 4.83 ટકાનો વધારો થયો છે. સ્વાસ્થ્ય મંત્રાલયના સવારે આઠ વાગ્યાના આંકડા મુજબ ઉપચારાધીન દર્દીઓની સંખ્યા વધીને 12,72,073 થઈ છે, જે 220 દિવસમાં સૌથી વધુ છે. કોરોના સંક્રમણથી વધુ 315 દર્દીઓનું મૃત્યુ થતાં મૃતકોની સંખ્યા વધીને 4,85,350 થઈ ગઈ છે. એક્ટિવ કેસોની સંખ્યા કુલ સંક્રમિતોના પ્રમાણમાં 3.48 ટકા છે. રાષ્ટ્રીય સ્તરે કોવિડ-19માંથી સાજા થનારાનો દર ઘટીને 95.20 ટકા થયો છે. 19મી મેએ એક દિવસમાં સંક્રમણના 2,76,110 કેસ નોંધાયા હતા. 
છેલ્લા એક દિવસમાં એક્ટિવ કેસની સંખ્યામાં 1,54,542નો વધારો થયો છે. દૈનિક સંક્રમણ દર 14.78 ટકા છે, જ્યારે અઠવાડિક સંક્રમણ દર 11.83 ટકા છે. કોરોનામાંથી સાજા થનારાની સંખ્યા વધીને 3,48,24,706 થઈ ગઈ છે, જ્યારે મૃત્યુદર 1.33 ટકા નોંધાયો છે. દેશવ્યાપી વૅક્સિનેશન અભિયાન હેઠળ અત્યાર સુધીમાં વૅક્સિનના 155.39 કરોડથી વધુ ડૉઝ આપવામાં આવ્યા છે.
Published on: Sat, 15 Jan 2022

© 2022 Saurashtra Trust