વડા પ્રધાન પાંચમી ફેબ્રુઆરીએ સ્ટેચ્યુ અૉફ ઇક્વાલિટીનું અનાવરણ કરશે

વડા પ્રધાન પાંચમી ફેબ્રુઆરીએ સ્ટેચ્યુ અૉફ ઇક્વાલિટીનું અનાવરણ કરશે
તેલંગણામાં સ્વામી રામાનુજાચાર્યની 216 ફૂટ ઊંચી પ્રતિમા
હૈદરાબાદ, તા. 20 : અગિયારમી સદીના સ્વામી રામાનુજાચાર્ય ક્રાંતિકારી સમાજ સુધારક અને વિશિષ્ટાદ્વેત સિદ્ધાંતના સ્થાપક છે. તેલંગણાના હૈદરાબાદ સ્થિત શમશાબાદ ખાતે 45 એકરમાં ફેલાયેલા સ્ટેચ્યુ અૉફ ઇક્વાલિટી ખાતે રામાનુજાચાર્યની 216 ફૂટ ઊંચી પ્રતિમાનું અનાવરણ વડા પ્રધાન નરેન્દ્ર મોદીના હસ્તે 5 ફેબ્રુઆરી, 2022ના કરાશે. જ્યારે રાષ્ટ્રપતિ રામનાથ કાવિંદ 13 ફેબ્રુઆરીએ 120 કિલો સોનાના બનેલા સ્વામી રામાનુજના આંતરિક કક્ષનું અનાવરણ કરશે. 
શ્રી રામાનુજ સહસ્રાબ્દી સમારોહના ભાગરૂપ આયોજિત કાર્યક્રમની સાથોસાથ 1035 યજ્ઞ આહુતિ આપવામાં આવશે. એ સાથે સામૂહિક મંત્ર-જાપ જેવા આધ્યાત્મિક કાર્યક્રમોનું પણ આયોજન કરાયું છે. સ્વામીજીની એક હજારમી જંયતી નિમિત્તે થઈ રહેલા કાર્યક્રમની શરૂઆત બીજી ફેબ્રુઆરીથી થશે. તેલંગણાના મુખ્ય પ્રધાન ચંદ્રશેખર રાવ, ચિન્ના જીઆર સ્વામી સાથે આ કાર્યક્રમનું આયોજન કરી રહ્યા છે. કાર્યક્રમમાં અન્ય રાજ્યોના મુખ્ય પ્રધાનો, નેતાઓ, મહાનુભાવો અને કલાકારો ઉપસ્થિત રહેશે. 
એક હજાર કરોડ રૂપિયાની આ યોજનાને વિશ્વસ્તરે ભક્તોએ આપેલા દાનમાંથી પૂરી કરવામાં આવી છે. આંતરિક ગર્ભગૃહના મુખ્ય દેવતા શ્રી રામાનુજાચાર્ય 120 કિલો સોનાના છે, જે તેમના પૃથ્વી પર અવતારિત થયાનાં 120 વર્ષ પૂરાં થયાં એના ઉપલક્ષમાં બનાવાયા છે.
બહારના 216 ફૂટના સ્ટેચ્યુ અૉફ ઇક્વાલિટી બેઠેલી મુદ્રાની દુનિયાની બીજી સૌથી ઊંચી પ્રતિમા હશે. પંચ ધાતુ, સોનું-ચાંદી-તાંબું-પિત્તળ અને જસતમાંથી બનાવવામાં આવી છે. પરિસરમાં રહસ્યવાદી અલવાર તમિલ સંતોના સાહિત્યમાં ઉલ્લેખ કરાયેલ 108 અલંકૃત નકશીદાર વિષ્ણુ મંદિરોની 108 દિવ્ય પ્રતિકૃતિઓ છે. 
શ્રી પેરુમ્બદૂર, તમિલનાડુમાં 1017માં જન્મેલા શ્રી રામાનુજાચાર્યએ રાષ્ટ્રીયતા, લિંગ, નસલ, જાતિ કે પંથની પરવા કર્યા વિના દરેક માનવી સમાન છે. લાખો લોકોને સામાજિક, સાંસ્કૃતિક, લૈંગિક, શૈક્ષિક અને આર્થિક ભેદભાવથી મુક્તિ અપાવી હતી. તેમણે ભેદભાવના શિકાર બનેલા લોકો સહિત દરેક માટે મંદિરોના દરવાજા ખોલ્યા હતા. તેઓ દુનિયાભરના સમાજ સુધારકો માટે સમાનતાના કાલાતીત પ્રતીક બન્યા છે. મહાન જ્યોતિર્ધર આદિ શંકરાચાર્યના અદ્વેતવાદને વિશિષ્ટાદ્વેત તરીકે પ્રસ્થાપિત કરનારા સ્વામી રામાનુજાચાર્ય વૈષ્ણવાચાર્ય તરીકે જગવિખ્યાત છે.
Published on: Fri, 21 Jan 2022

© 2022 Saurashtra Trust

Developed & Maintain by Webpioneer