રણબીર અને શ્રદ્ધા કપૂરની ફિલ્મ તું જૂઠી મૈં મક્કાર બૉક્સ અૉફિસ પર જોરદાર પરફૉર્મ કરી રહી છે, પણ એ સાથે જ તેના વિશે નકારાત્મક પબ્લિસિટી થઈ રહી છે. થોડા દિવસ પહેલા એવા સમાચાર આવ્યા હતા કે, રણબીર કપૂરે આ ફિલ્મ માટે પોતાની ફી ચાર્જ કરી નથી, કેમ કે નિર્માતા-દિગ્દર્શક લવ રંજનની આર્થિક સ્થિતિ છેલ્લા ચાર વર્ષથી સારી નથી. જોકે, આ સમાચાર આવ્યા પછી નેટિઝન્સે ફિલ્મ અને રણબીરને ટ્રૉલ કરવાનું શરૂ કર્યું છે. તેમનું કહેવું છે કે, જો રણબીરે પોતાની ફી લીધી ન હોય તો પછી ફિલ્મનું બજેટ 200 કરોડ રૂપિયા પર કેવી રીતે પહોંચી ગયું?
માત્ર છ દિવસમાં જ તું જૂઠી મૈં મક્કારે ટિકિટબારી પર પંચોતર કરોડ રૂપિયાથી વધુની કમાણી કરી છે અને હાલમાં જ એક વીડિયો ઈન્ટરનેટ પર વાઈરલ થયો છે, જેમાં ફિલ્મના નિર્માતા-દિગ્દર્શક લવ રંજન કહી રહ્યા છે કે, ફિલ્મ માટે રણબીરે એક પાઈ પણ ચાર્જ કરી નથી. જોકે, ફિલ્મના બજેટને લઈને શરૂઆતથી જ ચર્ચા છે. શરૂઆતમાં આવેલા અહેવાલો મુજબ, ફિલ્મનું બજેટ 70-75 કરોડ છે. તો, આગળ જતાં એવા રિપોર્ટ્સ હતા કે, દોઢસો કરોડ પ્લસના બજેટમાં ફિલ્મ બની છે. તો છેલ્લે નિર્માતા ભૂષણકુમારે (ટી-સિરીઝ) જણાવ્યપું હતું કે, બજેટનો પનો 200 કરોડની આસપાસ પહોંચ્યો છે. હવે, આ જુદા-જુદા દાવાઓને લઈને ઈન્ટરનેટ પર લોકો ફિલ્મની મજાક ઊડાડી રહ્યા છે. ફિલ્મ માટે રણબીરે ફી લીધી ન હોય તો 200 કરોડનું બજેટ ક્યાં ખર્ચાયું? શું સંગીતકાર પ્રીતમે વધુ પૈસા લીધા કે પછી શ્રદ્ધા કપૂરનું મહેનતાણું વધુ છે? જોકે, ફિલ્મ સાથે સંકળાયેલા લોકો તરફથી આવી રહેલી જુદી-જુદી બાબતોને લઈને લોકો મજાક ઊડાડી રહ્યા છે.