સ્થાનિક બજારમાં સોનું રૂા. 62,000 થવાની શક્યતા
ઇબ્રાહિમ પટેલ તરફથી
મુંબઈ, તા. 17 : આજે આખા વિશ્વમાં એક જ પ્રશ્ન થઈ રહ્યો છે, શું આપણે વધુ એક નાણાં કટોકટી તરફ આગ્રેસર છીએ? એનાલિસ્ટો કહે છે કે બસ જે તરફ જઈ રહી છે, તે તો એ જ સૂચવે છે. અમેરિકન ટ્રેઝરી બિલ અને યુરોઝોન બોન્ડ યીલ્ડ ઘટ્યા, બાંકિંગ શેરો તૂટ્યા પછી સર્જાયેલી વિશ્વાસની કટોકટીએ હવે વ્યાજદર વૃદ્ધિની અપેક્ષાઓ પણ વધી છે. રોકાણકારો સલામતીની શોધમાં સોના-ચાંદી તરફ પાછા ફર્યા છે, તેજી નવેસરથી આગળ વધવા લાગી છે.
નાઈન ડાયમંડ્સના ચૅરમૅન સંજય શાહના જણાવ્યા મુજબ અમેરિકાની બૅન્કિંગ કટોકટીના કારણે આવનારા છ માસમાં સ્થાનિક રિટેલ બજારમાં સોનાનો ભાવ રૂા. 62,000ની આસપાસ પ્રતિ 10 ગ્રામ જવાની શક્યતા છે. સોનું મોંઘું થવાથી તેની ખરીદી ઘટશે અને લોકો એક ગ્રામની ગોલ્ડ જવેલરી ખરીદવાનું વધારે પસંદ કરશે અને ચાંદીના રોકાણમાં આકર્ષણ વધશે. તે સાથે ઈમિટેશન જ્વેલરીની માગ પણ વધશે.
નાયમેક્સ એપ્રિલ રોકડો વાયદો બુધવારે 1942 ડોલર પ્રતિ ઔંસ (31.10347 ગ્રામ) થયા બાદ ગુરુવારે કેટલાંક નબળા મનના ખેલાડીઓ, છ સપ્તાહની ઊંચાઈએથી નફો ગાંઠે બાંધવા આવતા, ભાવ 1911.50 ડોલર સુધી નીચે મુકાયા હતા. રોકડો વાયદો 2 ફેબ્રુઆરીએ ઇન્ટ્રાડેમાં 1959.10 ડોલર બોલાયા પછી સિઝન હાઇ 1942.45 ડોલર રહ્યો હતો. કેટલાક ટ્રેડરોએ બુધવારે હાજર સોનાના સોદા, વાયદાની નજીકના ભાવે 1935 ડોલરમાં કર્યા હતા, જે એક સપ્તાહ અગાઉ કરતાં 100 ડોલર વધુ હતા. હાજર સોનું પણ ઇન્ટ્રાડેમાં 1937 ડોલર બોલાયું હતું જે છ સપ્તાહની ઊંચાઈએ હતું.
7 ઓગસ્ટ 2020ના રોજ 2075 ડોલરની ઓલ ટાઈમ હાઇ નોંધાવ્યા પછી છેલ્લાં બે વર્ષ દરમિયાન ભાવ 1680 અને 1980 ડોલર વચ્ચે અથડાતાં રહ્યા હતા. આરંભમાં મંદીવાળાઓએ 1680 ડોલરને સપોર્ટ લેવલ બનાવીને ભાવ તોડયે રાખ્યા હતા. અલબત્ત, લાંબા સમય સુધી તેજીવાળા 2000 ડોલરની ભાવ સપાટી તોડવામાં નિષ્ફળ ગયા છે. જોકે, સપ્ટેમ્બર 2022માં નાણાકીય બજારમાં ચિંતાઓ ચરમસીમાએ પહોંચી ત્યારે તેજીવાળાને તાત્પૂરતી રાહત મળી હતી અને ભાવ ઘટતા અટક્યા હતા.
અમેરિકાની સિલિકોન વેલી બેન્ક નિષ્ફળ ગયા પછી યુરોપની બીજા નંબરની સૌથી મોટી સ્વિત્ઝર્લેન્ડની ક્રેડિટ સ્યૂઇસના શેર બુધવારે જ્યુરિચ શેરબજાર ખાતે 30 ટકા કરતાં વધુ તૂટી પડતાં, આખી દુનિયામાં હોબાળો મચી ગયો હતો. અમેરિકાના ટ્રેઝરી ડિપાર્ટમેન્ટે કહ્યું કે ક્રેડિટ સ્યૂઇસના લોચા પછી અમે અમેરિકન બૅન્કોનું તેમાં કેટલું હિત છે, તે ચકાસી રહ્યા છીએ.
આ ઘટના પછી હવે ગોલ્ડ માઇનિંગ કંપનીઓ આ ક્ષેત્રની મજબૂતીનું આકલન કરવા લાગી છે. ગુરુવારે રાજિંદો ગોલ્ડ સિલ્વર રેશિયો (એક ઔંસ સોનાથી ખરીદી શકાતી ચાંદી અથવા સોનાના ભાવ ભાગ્યા ચાંદીના ભાવ) 87.88 આવતા આવું આકલન આવશ્યક બન્યું હતું.