• શનિવાર, 02 ડિસેમ્બર, 2023

ફિફા મહિલા વિશ્વ કપ : પોર્ટુગલની પહેલી જીત : વિયેતનામને 2-0થી હાર આપી  

ચૅમ્પિયન અમેરિકા અને રનર્સઅપ નેધરલૅન્ડસ વચ્ચેની મૅચ 1-1થી ડ્રૉ : નાઇઝીરિયાનો અૉસ્ટ્રેલિયા સામે 3-2થી રોમાંચક વિજય

ડૂનેડિન (ન્યુઝીલેન્ડ), તા.27: પોર્ટૂગલની ફૂટબોલ ટીમે ફીફા મહિલા વિશ્વ કપના તેના બીજા મેચમાં પ્રથમ જીતનો સ્વાદ ચાખ્યો છે. ગ્રુપ ઇના આજના મેચમાં પોર્ટૂગલનો વિયેતનામ વિરુદ્ધ 2-0 ગોલથી શાનદાર વિજય થયો હતો. આ મેચમાં પોર્ટૂગલ તરફથી તેલ્મા એન્કાર્નાચાઓએ 7મી અને ફ્રાંસિસ્કા નજારેથે 21મી મિનિટે ગોલ કર્યા હતા. મહિલા ફૂટબોલ વિશ્વ કપના ઇતિહાસમાં પોર્ટૂગલની આ પહેલી જીત છે. ગ્રુપ ઓફ ડેથ- ઇ ગ્રુપમાં પોર્ટૂગલની ટીમ અમેરિકા અને નેધરલેન્ડ્સ સાથે છે. પહેલા મેચમાં તેનો ડચ ટીમ સામે 0-1થી પરાજય થયો હતો.

આ ગ્રુપના અન્ય એક મેચમાં ગત ઉપવિજેતા નેધરલેન્ડસ અને ગત ચેમ્પિયન અમેરિકાની મહિલા ટીમ વચ્ચે જોરદાર રસાકસી થઈ હતી અને અંતમાં મેચ 1-1 ગોલથી ડ્રો રહ્યો હતો. 17મી મિનિટે ગોલ કરીને નેધરલેન્ડ્સની ટીમે સરસાઈ મેળવી હતી. આ પછી અમેરિકાએ 62મી મિનિટે બરાબરીનો ગોલ કર્યો હતો. જે લિંડસે હોરાને કર્યો હતો. ગ્રુપ ઇમાં હવે તા. પહેલીએ નેધરલેન્ડ્સની ટીમનો સામનો વિયેતનામ સામે થશે જ્યારે અમેરિકા સામે પોર્ટૂગલ હશે. હાલ અમેરિકા અને નેધરલેન્ડસની ટીમ પાસે 4-4 અંક છે. આજના અંતિમ મેચમાં નાઇઝીરિયાનો મજબૂત ઓસ્ટ્રેલિયા વિરૂધ્ધ 3-2 ગોલથી રોમાંચક વિજય થયો હતો.