ફિલ્મ સેલિબ્રિટીઝ પોતાના નાના સંતાનનો ચહેરો જાહેરમાં કે સોશિયલ મીડિયા પર મૂકવાનું ટાલતા હોય છે. કરીના કપૂર ખાન આમાં અપવાદરૂપ છે. આથી જ તેના બંને દીકરા તૈમૂર અને જેહ ફોટોગ્રાફરો અને સોશિયલ મીડિયા પર અત્યંત લોકપ્રિય થઈ ગયા છે. પ્રિયંકા ચોપરા જોનાસની દીકરી માલતી મેરી તાજેતરમાં એક વર્ષની થઈ છે. જોકે, પ્રિયંકાએ પણ અત્યાર સુધી માલતીની તસવીર ચહેરા પર હાર્ટનું ઈમોજી મૂકીને જ દર્શાવી હતી. પરંતુ હાલમાં જોનાસ બ્રધર્સની વૉક અૉફ ફૅમ ઇવેન્ટમાં હાજર પ્રિયંકાએ માલતીનો ચહેરો બતાવ્યો હતો. તે પહેલી હરોળમાં માલતીને ખોળામાં લઈને બેઠી હતી. ક્રીમ કલરના આઉટફિટ અને મેચિંગ હેરબેન્ડમાં માલતી એકદમ કયુટ લાગતી હતી. તેના કાન વીંધાયેલા છે અને તેમાં નાનો સોનાનો દાણો પહેરાવવામાં આવ્યો છે. પ્રિયંકાએ ઇન્સ્ટાગ્રામ પર ઇવેન્ટની તસવીરો અને વીડિયો શૅર કર્યા છે, જેમાં માલતીનો ચહેરો સ્પષ્ટ જોઈ શકાય છે.
પ્રિયંકાએ ઇન્સ્ટાગ્રામ પર ફોટો શૅર કરતાં લખ્યું, મને તારા પર ગર્વ છે, પ્રેમ, જોનાસ બ્રધર્સને અભિનંદન. આ તસવીરમાં જોનાસ ભાઈઓ સ્ટેજ પર વૉક અૉફ ફૅમ સર્ટિફિકેટ સાથે ઊભેલા જોવા મળે છે. જ્યારે પ્રિયંકા અને માલતી પ્રેક્ષકગણમાં છે. વીડિયોમાં પ્રિયંકા માલતીને રમાડતી દેખાય છે.
નિકે લખ્યું છે, મારી સુંદર પત્ની, તું હંમેશાં મુશ્કેલ પરિસ્થિતિમાં પણ એકદમ શાંત રહે છે એકદમ ખડકની જેમ. તારી સાથે મારા લગ્ન થયા એ જ મોટી ભેટ છે. હું ખુશ છું કે મને તારી સાથે પિતા બનવાનું સુખ મળ્યું. માલતીને જોઈને પ્રિયંકા અને નિકના ચાહકો ખુશ થઈ ગયા હતા અને તે પિતા નિક જેવી દેખાય છે એવી કમેન્ટ કરી હતી.