અમારા પ્રતિનિધિ તરફથી
મુંબઈ, તા. 5 : કાળઝાળ ઉનાળાને કારણે મુંબઈને પાણી પુરવઠો કરતાં તળાવોમાં પાણીની સપાટી સતત ઘટી રહી છે ત્યારે મુંબઈ પાલિકાએ નાણાકીય વર્ષ 2023-24માં પાણીના દરમાં 7.12 ટકા વધારો કરવાની તૈયારી આદરી છે. પાણીના દરમાં વધારો 16મી જૂનથી અમલમાં આવશે.જોકે, મહારાષ્ટ્ર સરકારમાં મહત્ત્વના ભાગીદાર પક્ષ ભાજપના મુંબઈ એકમના વડા આશિષ શેલારે મુંબઈગરા માટે પાણીના દર વધારવા સામે વિરોધ દર્શાવ્યો છે.
મુંબઈ પાલિકા દ્વારા મુંબઈગરાને દરરોજ 3850 મિલિયન લિટર પાણી પૂરું પાડવામાં આવે છે. આ પહેલાં પાલિકાએ વર્ષ 2012માં પાણી દરમાં દરવર્ષે મહત્તમ આઠ ટકા સુધી વધારો કરવાનો નિર્ણય લેવામાં આવ્યો હતો. હાલ પાલિકામાં ચૂંટાયેલા નગરસેવકો નહીં હોવાથી સ્થાયી સમિતિએ આ અંગેના અધિકાર વહીવટીતંત્રને આપ્યા છે. આ નિર્ણયને આધારે પાલિકા દ્વારા દરવર્ષે 16મી જૂનથી પાણીના દરમાં વધારો કરવામાં આવે છે.
એસ્ટાબ્લિશમેન્ટ કોસ્ટ (આસ્થાપના ખર્ચ), ભાતસા બંધના પાણીપુરવઠા માટે મહારાષ્ટ્ર સરકારને અપાતી રોયલ્ટી, પાણીના શુદ્ધીકરણની પ્રક્રિયા, વીજળીનો ખર્ચ અને જાળવણીના અન્ય ખર્ચને ધ્યાનમાં રાખીને પાણીના દરમાં વધારાનો પ્રસ્તાવ પાલિકાતંત્ર દ્વારા તૈયાર કરવામાં આવે છે.
