પટણા, તા. 7: આગામી લોકસભા ચૂંટણીને લઈને ભાજપ વિરોધી દળોની સંયુક્ત બેઠક 23મી જૂનના રોજ બિહારની રાજધાની પટણામાં થશે. જેડીયુના રાષ્ટ્રીય અધ્યક્ષ રાજીવ રંજન ઉર્ફે લલન સિંહે બુધવારે પ્રેસ કોન્ફરન્સમાં જાણકારી આપી હતી. લલન સિંહે કહ્યું હતું કે, આ બેઠકમાં કોંગ્રેસ નેતા રાહુલ ગાંધી, કોંગ્રેસ અધ્યક્ષ મલ્લિકાર્જુન ખડગે, ઉદ્ધવ ઠાકરે, મમતા બેનરજી, શરદ પવાર, હેમંત સોરેન, અખિલેશ યાદવ વગેરે સામેલ થશે તેવી સહમતી આપી છે. ઉલ્લેખનીય છે કે, વિપક્ષી દળોની બેઠક પહેલા 12મી જૂને થવાની હતી. જો કે રાહુલ અને ખડગે સામેલ ન થવાની સ્થિતિમાં બેઠક રદ કરવામાં આવી હતી.
