મિયામી, તા.29 : ભારતનો અનુભવી ટેનિસ ખેલાડી રોહન બોપન્ના અને તેનો ઓસ્ટ્રેલિયન જોડીદાર મેથ્યૂ ઇબડેન મિયામી ઓપનના મેન્સ ડબલ્સના ફાઇનલમાં પહોંચ્યા છે. ઇન્ડો-ઓસ્ટ્રેલિયન જોડીએ સેમિ ફાઇનલમાં સ્પેનના માર્સેલ ગ્રેનોલર્સ અને આર્જેન્ટિનાના હોરાસિયો જેબાલોસને 6-1 અને 6-4થી હાર આપી હતી. આ વર્ષે ગ્રાંડસ્લેમ ટૂર્નામેન્ટમાં ચેમ્પિયન બની ઇતિહાસ રચનાર રોહન બોપન્ના અને તેનો જોડીદાર મેથ્યૂ ઇબડેન ફાઇનલમાં ક્રોએશિયાના ઇવાન ડોડિન અને અમેરિકાના ઓસ્ટિન ક્રાજિસેકની જોડી સામે ટકરાશે. આ જોડીનો બીજા સેમિ ફાઇનલમાં જર્મનીના કેવિન અને ટિમ સામે રસાકસી બાદ 6-4, 6-7 અને 10-7થી વિજય થયો હતો. ઓસ્ટ્રેલિયન ઓપનની જીત બાદ 44 વર્ષીય રોહન બોપન્ના નંબર વન ક્રમાંક પર પહોંચનારો સૌથી મોટી વયનો ટેનિસ ડબલ્સ ખેલાડી બન્યો હતો. આ સાથે જ લિયેન્ડર પેસ પછી તમામ 9 એટીપી માસ્ટર્સ ટૂર્નામેન્ટના ફાઇનલમાં પહોંચનારો બોપન્ના ભારતનો બીજો ખેલાડી બન્યો છે.
