રાજકોટને વિકાસ પ્રકલ્પોની ભેટ આપતા વડા પ્રધાન  

અમારા પ્રતિનિધિ તરફથી 

રાજકોટ, તા. 27 : મોદીના હસ્તે આજરોજ રૂ.264.96 કરોડના ખર્ચે સૌની યોજના લિંક-3 પેકેજ-8 અને રૂ.128.71 કરોડના ખર્ચે સૌની યોજના લિંક-3, પેકેજ-9 અંતર્ગત નાખવામાં આવેલી એક્સ્ટેન્શન ફીડર પાઇપલાઇનનું પણ લોકાર્પણ કરવામાં 

આવ્યું હતું. વડાપ્રધાને જણાવ્યું હતું કે, આ બન્ને પ્રોજેક્ટ સૌરાષ્ટ્રના ડઝનો ગામોના ખેડૂતોને સિંચાઈ અને પીવાનું પાણી ઉપલબ્ધ કરાવશે. 

તેમણે ઉમેર્યું હતું કે, છેલ્લા 9 વર્ષમાં કેન્દ્ર સરકારે સમાજના દરેક વર્ગના જીવનને સરળ બનાવવાનો પ્રયત્ન કર્યો છે. અમે `ગૂડ ગવર્નન્સ સુ-શાસન'ની ગેરેન્ટી આપીને આવ્યા છીએ અને તેને પૂર્ણ કરીને દેખાડી રહ્યા છીએ.

વડા પ્રધાને જણાવ્યું હતું કે, વર્ષ 2014 પહેલા મધ્યમવર્ગીયની મુખ્ય એક ફરિયાદ `કનેક્ટિવિટી'ની હતી. છેલ્લાં 9 વર્ષમાં અમે આ પરેશાની દૂર કરવાનો પ્રયત્ન કર્યો છે. 2014માં માત્ર 4 શહેરોમાં મેટ્રો નેટવર્ક હતું આજે દેશના 20થી વધુ શહેરોમાં મેટ્રો નેટવર્ક પહોંચી ગયું છે. દેશના 25 અલગ-અલગ રૂટ ઉપર `વંદે ભારત' જેવી આધુનિક ટ્રેનો ચાલી રહી છે. 2014માં દેશમાં માત્ર 70 એરપોર્ટ હતા આજે તેની સંખ્યા ડબલથી વધી ગઈ છે. 

ભારતની કંપનીઓ લાખો કરોડો રૂપિયાનાં નવા વિમાનો ખરીદી રહી છે. આજે હિન્દુસ્તાનમાં 1 હજાર નવા વિમાનોનો ઓર્ડર બુક છે. આવનારા દિવસોમાં એ આંકડો 2000 વિમાનોનો હશે. હવે એ સમય દૂર નથી જ્યારે ગુજરાતમાં એરોપ્લેન બનશે. 

ગરીબી વિશે મોદીએ જણાવ્યું હતું કે, અમારી સરકારના પ્રયત્નથી દેશમાં ગરીબી ઘટી છે. તાજેતરમાં જ એક રિપોર્ટ આવ્યો છે જેમાં છેલ્લાં પાંચ વર્ષમાં દેશના 13.5 કરોડ લોકો ગરીબીમાંથી બહાર નીકળીને `િનયો મીડલક્લાસ'માં સામેલ થયાં છે. એક નવા મધ્યમવર્ગનું સર્જન થયું છે. 

પ્રધાનમંત્રી આવાસ યોજના અંર્તત મધ્યમવર્ગીય પરિવારોને ઘર બનાવવા વિશેષ સહાય આપવામાં આવી છે. દેશના 6 લાખથી વધુ તેમજ ગુજરાતના 60 હજારથી પણ વધુ લોકો આ યોજના હેઠળ આજે ઘરનું ઘર મેળવી શક્યા છે.

રાજકોટે મને ઘણું શીખવ્યું : મોદી

વડાપ્રધાન નરેન્દ્ર મોદીએ ફરી એક વખત રાજકોટનું પોતાના પર રહેલું ઋણ અને રાજકોટવાસીઓની રહેણીકહેણીનો પોતાનાં વક્તવ્યમાં ઉલ્લેખ કર્યો હતો. તેમણે કહ્યું હતું કે, રાજકોટમાં કાર્યક્રમ હોય, રજાનો દિવસ ન હોય અને બપોરનો સમય હોય તેવા સમયે કોઈપણ સભા કરવાનું ન વિચારે પરંતુ આજે આટલી વિશાળ જનમેદનીને જોતા એવું લાગી રહ્યું છે કે, આજે રાજકોટે રાજકોટના જ તમામ રેકોર્ડ તોડી નાખ્યા છે. તેઓએ ઉમેર્યું હતું કે, રાજકોટે મને ઘણું શીખવ્યું છે. હું પ્રથમ વખત અહીંથી જ ધારાસભ્ય બન્યો. મારી રાજકીય યાત્રાને લીલીઝંડી દેખાડવાનું કામ રાજકોટે કર્યું છે. રાજકોટનું મારા ઉપર ઋણ છે અને હું હમેશાં એ ઋણ ઉતારવાનો પ્રયત્ન કરતો રહ્યો છું.