• સોમવાર, 17 જૂન, 2024

હવે નજર છેલ્લા બે તબક્કા ઉપર

પાંચમા તબક્કાની ચૂંટણી પછી અત્યાર સુધી 428 બેઠકો પર મતદાન થયું છે, પરંતુ રાજકીય ધુમ્મસ હજી સુધી વિખેરાયું નથી. પાંચમા તબક્કામાં કુલ 49 બેઠકો પર મતદાન થયું, ભાજપ બેઠકો પર ફરી એકવાર સરસાઈને લઈ આશ્વસ્ત છે. વિપક્ષ બહેતર પ્રદર્શનની આશા સાથે હવે બચેલા બે તબક્કામાં ભાજપના કિલ્લામાં ગાબડાં પાડવાનો દાવો કરી રહ્યો છે.

આગલા બે તબક્કામાં પંજાબને બાદ કરતાં ચૂંટણી થવાની છે તે મોટા ભાગે ભાજપના કિલ્લા છે. આમ છતાં ભાજપ ત્યાં જીત મેળવવા ભારે મહેનત કરે છે. બતાવે છે કે પક્ષ વધુ પડતા આત્મવિશ્વાસથી બેદરકાર નથી. આગામી બે તબક્કામાં 115 બેઠકો પર ચૂંટણી થવાની છે જ્યાં `હોમપીચ' પર રમવાની તક છે.

છઠ્ઠા તબક્કામાં બિહારની જે આઠ બેઠકો પર ચૂંટણી છે બધા પર ગઈ ચૂંટણીમાં ભાજપની નેતૃત્વવાળી એનડીએની જીત થઈ હતી. ત્યારે ભાજપને અહીં ચાર, જનતા દળ(યુ)ને ત્રણ અને એલજીપીને એક બેઠક મળી હતી. ઓડિશાની બેઠકોમાંથી ચાર બીજેડી અને બે ભાજપને મળી હતી. ઉત્તર પ્રદેશની 14માંથી ભાજપને નવ, બસપાને ચાર અને સપાને એક બેઠક મળી હતી.

પશ્ચિમ બંગાળની આઠ બેઠકોમાં પાંચ ભાજપ અને ત્રણ તૃણમૂલના ખાતામાં ગઈ હતી. હરિયાણાની બધી 10 બેઠકો અને દિલ્હીની બધી સાત બેઠકો ભાજપના ખાતામાં ગઈ હતી. ઝારખંડની ચાર બેઠકોમાંથી ત્રણ ભાજપ પાસે અને એક ઝારખંડને મળી હતી. ભાજપે ઉત્તર પ્રદેશનો પોતાનો કિલ્લો બચાવવામાં કોઈ પ્રયાસ બાકી નથી રાખ્યો. તેની સાથોસાથ હરિયાણા અને દિલ્હીમાં પણ પૂરતી કાળજી ભાજપે લેવી પડશે. હિન્દી પટ્ટામાં ભાજપ સામે વિપક્ષ રાજદ પડકાર ઊભો કરી શક્યો નથી.

લોકસભાની ચૂંટણીને લઈ ભાજપના નેતા અમિત શાહ તો 400 પારનું ટાર્ગેટ પક્ષ પાર પાડશે એમ વિશ્વાસપૂર્વક કહી રહ્યા છે. ધારણા સચોટ પડે તો ભાજપને હરિયાણા અને મહારાષ્ટ્રમાં ફાયદો થવો નક્કી છે, જ્યાં પાંચ મહિના પછી વિધાનસભાની ચૂંટણી થવાની છે અને અહીં ભાજપ અને એનડીએની સરકારો છે. રાજ્યોમાં લોકસભા ચૂંટણીનાં પરિણામ રાજ્યોની રાજનીતિ અને ત્યાં બનનારાં ભાવિ ગઠબંધનને પણ અસર પહોંચાડશે.