કુલદીપ યાદવની છ રનમાં ચાર વિકેટ: જાડેજાએ ત્રણ વિકેટ લીધી : વિન્ડિઝ તરફથી કપ્તાન શાઇ હોપના 43 રન
બ્રિજટાઉન તા.27: ચાઇનામેન બોલર કુલદિપ યાદવની ફિરકી (6 રનમાં 4 વિકેટ) અને સ્ટાર ઓલરાઉન્ડર રવીન્દ્ર જાડેજાની સ્પિન જાળ (37 રનમાં 3 વિકેટ)માં ફસાઇને આત્મવિશ્વાસ વિહોણી વેસ્ટ ઇન્ડિઝની ટીમ પહેલા વન ડેમાં માત્ર 23 ઓવરમાં 114 રને તંબુ ભેગી થઇ ગઇ હતી. વેસ્ટ ઇન્ડિઝ તરફથી એકમાત્ર કપ્તાન શાઇ હોપે 45 દડામાં 4 ચોકકા અને 1 છકકાથી 43 રનની ઇનિંગ રમી હતી. જયારે નવોદિત બેટર એલેક એથનેજે 28 દડામાં 3 ચોકકા અને 1 છકકાથી 22 રન બનાવ્યા હતા.
ભારતીય કપ્તાન રોહિત શર્માનો ટોસ જીતીને પહેલા ફિલ્ડીંગ કરવાનો નિર્ણય બોલરોએ યોગ્ય સાબિત કર્યોં હતો. હાર્દિક પંડયાએ કાઇલ મેયર્સ (2)ના રૂપમાં ભારતને પહેલી સફળતા અપાવી હતી. આ પછી વારાફરતી કેરેબિયન બેટધરોને આવન-જાવન ચાલુ રહી હતી. વન ડે વિશ્વ કપમાં કવોલીફાય ન થવાથી આત્મવિશ્વાસ ખોઈ ચૂકેલી વેસ્ટ ઇન્ડિઝની ટીમ પહેલા વન ડેમાં ભારતની બોલિંગ સામે કયારે પણ સ્થિર થઇ શકી ન હતી. તેના 6 બેટધર સીંગલ ફીગરમાં આઉટ થયા હતા. બ્રેડન કિંગે 17 અને સ્ટાર શિમરોન હેટમાયરે 11 રનની ઇનિંગ રમીને નિરાશ કર્યાં હતા. ભારત તરફથી કુલદિપ યાદવની 4 અને રવીન્દ્ર જાડેજાની 3 વિકેટ રહી હતી. આ ઉપરાંત હાર્દિક પંડયા, મુકેશકુમાર અને શાર્દુલ ઠાકુરે 1-1 વિકેટ લીધી હતી.
ભારતે આજે તેની ઇલેવનમાં વિકેટકીપર તરીકે ઇશાન કિશનને તક આપી હતી. આથી સંજૂ સેમસનને બહાર બેસવું પડયું હતું. ટેસ્ટ પછી વન ડેમાં પણ મુકેશકુમારે ડેબ્યૂ કર્યું હતું. ભારતની ઇલેવનમાં એકમાત્ર સ્પિનરના રૂપમાં ચાઇનામેન બોલર કુલદિપ યાદવ પસંદ કરાયો હતો.
