ડોનાલ્ડ ટ્રમ્પને ગ્રીનલૅન્ડમાં રસ છે અને પહેલા કાર્યકાળ દરમિયાન પણ તેમણે આ ટાપુ ખરીદી લેવાની વાત ઉચ્ચારી હતી. એ વખતે આ સોદાને મોટી એસ્ટેટની ડીલ તરીકે આગળ કરી હતી અને ડેન્માર્કને આ ટાપુ સાચવવાની આપદામાંથી મુક્ત કરવાની ડંફાશ પણ મારી હતી. છેલ્લા થોડા દિવસોમાં એકથી વધુ વાર ટ્રમ્પ અને તેમના વહીવટ તંત્રના વરિષ્ઠોએ વારંવાર ગ્રીનલૅન્ડને અમેરિકાની આણ હેઠળ લઈ આવવાની વાત ઉચ્ચારી છે. ટ્રમ્પ એક પણ ગોળી ચલાવ્યા વિના ગ્રીનલૅન્ડને અમેરિકા હેઠળ લાવી શકે છે. અખંડ યુનાઈટેડ સ્ટેટ્સમાં કયાં રાષ્ટ્રોની કલ્પના ટ્રમ્પે કરી છે, એ તો તેઓ જ જાણે પણ ભૌગોલિક દૃષ્ટિએ ઉત્તર અમેરિકાનો હિસ્સો એવો વિશ્વનો સૌથી મોટો આ ટાપુ યુરોપનો ભાગ ગણાય છે અને આ સ્વાયત્ત ક્ષેત્ર પર કિંગ્ડમ અૉફ ડેન્માર્કનું નિયંત્રણ છે. ડેન્માર્ક નાટોનું સભ્ય રાષ્ટ્ર છે અને તેની પાસે પોતાનું 16,000 સૈનિકોનું સૈન્ય છે, એ જોતાં અમેરિકા માટે ગ્રીનલૅન્ડ પર કબજો કરવાનું મુશ્કેલ નહીં હોય.
અમેરિકન પ્રેસિડન્ટ હૅરી ટ્રુમેને
1946માં 100 મિલિયન ડૉલરની કીમતનું સોનું આપી ડેન્માર્ક પાસેથી ગ્રીનલૅન્ડ ખરીદવાની
અૉફર કરી હતી, જે નકારી કાઢવામાં આવી હતી. ત્યારથી અમેરિકાનો ડોળો આ ટાપુ પર છે. ટ્રમ્પને
આ ટાપુમાં રસ છે, કેમ કે તેની એક તરફ એટલાન્ટિક મહાસાગર છે અને બીજી બાજુ આર્કટિક અૉશન
છે. ગ્લૉબલ વૉર્મિંગ-ક્લાયમેટ ચેન્જને કારણે આર્કટિક મહાસાગરમાંના ગ્લૅશિયર્સ અને આઈસ
શીટ્સ પીગળી રહ્યા છે, જેના કારણે નવા શાપિંગ રૂટ બનવાની શક્યતાઓ ઊભી થઈ છે, જેના કારણે
વેપારમાં સુગમતા વધી શકે છે. વળી, રશિયા અને ચીને આર્કટિક મહાસાગરમાં નવા વેપારી માર્ગ
વિકસાવવાની તૈયારી દેખાડી છે. ચીન અને રશિયાનો પગ અહીં પડયો તો એ અમેરિકા માટે સંરક્ષણની
દૃષ્ટિએ મોટું જોખમ છે. આથી અમેરિકા આ વેપારી માર્ગ પર ઈજારો સ્થાપવા થનગની રહ્યું
છે. આ વ્યૂહાત્મક મહત્ત્વ ઉપરાંત ગ્રીનલૅન્ડ ખનિજ તત્ત્વો અને ધાતુઓથી સમૃદ્ધ છે. ઈલેક્ટ્રોનિક
વેહિકલ અને બૅટરી બનાવવા માટે ઉપયોગી 34 કાચી સામગ્રીમાંથી 25 અહીં મળી આવે છે. વળી,
ખનિજ તેલ, ગૅસ તથા ગ્રૅફાઈટ, તાંબું, નિકલ, ઝિન્ક ઉપરાંત સોનું, હીરા, ટાઈટેનિયમ અને
ટંગ્સ્ટન અને યુરેનિયમ જેવી ધાતુ-ખનિજોનો ભંડાર પણ છે. હાલ આ ક્રિટિકલ રૉ-મટિરિયલનું
વિશ્વનું સૌથી મોટું નિકાસકાર ચીન છે.
ગ્રીનલૅન્ડની સત્તાવન હજારની લોકવસ્તીમાંથી
56 ટકા ડેન્માર્કથી સ્વતંત્ર થવા માગે છે, આવામાં અમેરિકા અહીંના નાગરિકોને અમેરિકાનું
નાગરિકત્વ આપી દે તો આપોઆપ આ દેશ યુએસએનો હિસ્સો બની શકે છે. આ વાત હવાઈ કિલ્લા જેવી
લાગતી હોય તો ન્યૂ યૉર્કના રિયલ એસ્ટેટ ડેવલપર અને અર્થશાસ્ત્રી ડેવિડ બેકરે ગયા વર્ષે
ગ્રીનલૅન્ડ ટાપુ ખરીદી લેવા અમેરિકાએ 12.5 બિલિયનથી 77 બિલિયન ડૉલર જેવી રકમ ચૂકવવી
પડે એવો અંદાજ બાંધ્યો હતો. ટ્રમ્પ આમાંથી કયો માર્ગ લેશે?
